Pětr Młónk
Serbski ludowy basnik
Pětr Młónk – před 150 lětami drje we wulkej Hodźijskej wosadźe skoro nichtó njebě, kotryž njeby tute mjeno znał a tež jeho markantne wobličo před wočomaj měł. Tute mjeno a předewšěm skutkowanje muža za nim zaso do wědomja wołać, to je zaměr nowowuhotowaneje wopomnjenskeje šćežki po najwažnišich stacijach jeho žiwjenja a z tym tež tuteho zešiwka. Narodźeny a na kóncu tež zemrěty w hranicach dźensnišeje Hodźijskeje gmejny, skutkowaše ze swojimi spěwami a basnjemi daloko po cyłej Łužicy a přinošowaše z tym k temu, zo by so stara wosadna wjes šěroko znata stała. Byrnjež so narodźił do jara skromnych poměrow jako syn roboćana na Žičeńskim kuble, je sej trěbne kubłanje a zrałosć nadźěłał, zo by ze swojim basnjenjom wutroby mnohich ludźi docpěł. Swoju serbsku maćeršćinu wužiwaše z wjesołym sebjewědomjom, formowaše ju přez ludowe wašnje swojich słowow sobu a přinošowaše tak za swój čas sylnje k wobchowanju wšědneje serbšćiny w serbskich wsach a wosadach Łužicy. Njeje připad, zo je Pětr Młónk w lěta 2010 znowa wušłym Spěwarskim ewangelskich Serbow ze swojimi spěwami sobu najhusćišo zastupjeny a zo wostanje jeho skutkowanje na tute wašnje tež dźensa hišće žiwe. Přetož narodźeny do doby, w kotrejž so nabožne jednanja w towaršnosći dźeń a bóle na bok tłóčachu, běše jemu naležnosć wutroby, křesćansku wěru čerstwje a wjesele wotewriene dźeržeć. dale dawać a tute žiwe žórło tróšta a nadźije přichodnym generacijam Na tutym krutym zakładźe zamóžeše bjez wulkeho spěchowanja wotwonka, skutkownje wužadanja žiwjenja zmištrować. Jako čłowjek a křesćan bě Pětr Młónk tak za swój čas mnohim z přikładom. Wudani so, sej tuteho njewšědneho serbskeho ludoweho basnika z našich rjadow znowa wotkryć a jeho skutkowanje płódne za nas dźensnišich sčinić. Njech tutón zešiwk a wopomnjenska šćežka Pětra Młónka k temu dopomhatej, zo by so wjeselo nad křesćanskim poselstwom wobswědčiło, lubosć k serbskej rěči a kulturje znowa budźiła, hłuboka zwjazanosć z domiznu spěchowała a zo bychmy po přikładźe Pětra Młónka aktiwnje za zhromadne derjeměće skutkowali.
Přewodne słowo Krystof Rummel, Serbski superintendent Hodźij w lěću 2025
